T.O.P擔正主演嘅《同窗生》，由曾執導《白夜行》嘅大導演朴信宇操刀。由於 T.O.P本身有跳舞底，演動作場面一定難唔到佢，加上 T.O.P憂鬱嘅眼神，演技亦令導演大為欣賞。 

韓面

又攞新人獎　花面 T.O.P催淚間諜

韓國殿堂級班霸 BIGBANG，上年一隻《 Alive》專輯，擸獎無數，威震 K-pop界。不過踏入 2013年， BIGBANG 5子轉型分拆上市，隊長 G-Dragon、大成及勝利相繼 solo出碟，隊中最靚仔 rapper T.O.P（崔勝賢）亦唔執輸向影壇進發。
由 T.O.P主演的新戲《同窗生》，將於下月頭韓國上畫，戲中扮演北韓間諜的 T.O.P唔只有煽情有動作，青靚白淨的他更被打到變花面貓， T.O.P粉絲睇見肯定見暈。最佩服係年屆 25的 T.O.P，竟可肌齡逆轉扮 19歲高中生，唱歌得、演戲掂，仲攞走埋今屆釜山影展「最佳新人」獎。韓國娛圈， BIGBANG玩晒！

俄羅斯係美國永遠的敵人，正如北韓同南韓亦係誓不兩立，所以韓國的間諜片長拍長有，年頭先有全智賢主演的《柏林諜變》；暑假輪到視帝金秀賢放笑彈的《 3個特攻美少年》，去到 11月將由 BIGBANG頭號帥哥 T.O.P接棒，推出動作諜戰片《同窗生》。

戲中 T.O.P同飾演細妹嘅金有貞，原本喺北韓生活得好幸福，但因做間諜嘅老豆任務失敗後，細妹被迫勞教，最後要 T.O.P做間諜來換取細妹自由，聽落個故事都幾沉重。 

今年 25歲嘅 T.O.P， 09年曾同隊友勝利合演電影《我的 19歲》、亦曾攞過《青龍電影節》等「最佳新人」。上週日（ 6日）， T.O.P憑新戲《同窗生》，再奪釜山電影節「最佳新人」獎，做極都係「最佳新人」，認真離奇。 

(繼續閱讀...)