太爛玩

黃大鈞：飲酒飲到似傳福音

今年 Wine& Dine由西九搬去門常開對出中環新海濱，岳少出任旅發局主席，找來唐唐、田北俊捐出靚酒，俾市民鬥快上網訂飛分一杯仔飲。有 gimmick，背後團隊陣容亦強，出動七位名酒評人當顧問團審視酒品，七名成員中，我們都熟悉的，首推前新聞主播黃大鈞。
放棄跑新聞走去講紅酒，唔想對住 CCTVB？「當初因為面癱而離職，其實多得 TVB， OT只有補假冇補水，我先有時間報讀品酒課程。」由追酒飲攬住廁所嘔，失禮街坊後，學識品酒發現另一個世界：「飲酒體會唔同晒，尤其是酒配到適當食物，真係會提升到另一境界，我好想同大家分享。我會用唔同方法推廣葡萄酒文化，直頭似傳福音。」

小學生飲啤酒

黃大鈞四五年前開始上堂學品酒，現正修讀英國 WSET第四級品酒課程，講到第一次飲酒，要追溯到小學生年代。「細個食飯，屋企人已經俾啤酒我飲。十幾歲時，有位 uncle帶支 82年 Lafite去食飯，我有份試，好香好醇，先發覺紅酒好飲得多。」細細個飲啤酒飲大，讀書年代愈飲愈厲害，飲到醉、嘔、斷片，直至有次參加婚宴醉到俾姊妹攬實當眾失儀，終於識反省，「再咁飲都唔係辦法，適逢放補假修讀品酒，自此用另一種態度對待飲酒。開始識慢慢享受，飲一啖要嗒真啲味。初初學飲好瘋狂，所有品酒活動都出席。後來發現身邊除了飲酒圈子之外，原來香港好少人飲酒，唔識酒所以抗拒。講真，飲酒唔一定要熟讀知識，鍾意就得，你估唐英年有讀好多品酒課程？都係靠飲得多。」

暫時唔做主播

「多人飲開心啲」，為興趣推廣葡萄酒，黃大鈞由不同渠道入手，包括出版《戀上葡萄酒》以入門角度講解，亦當上香港葡萄酒商會餐飲文化發展委員會主席，「加入商會工作，義務的，暫時最成功係有關玻璃樽徵費，最新構思推動餐廳不收或減收開瓶費，不過有啲阻力。」義務工作竟然想餐廳少賺一筆來鼓勵客人自攜酒水，夠膽識，之但係，邊個睬你！倒不如出多幾本書、考品酒師，甚至開鋪賣酒仲實際？「雖然有人向我招手重投新聞行業，但現在正職是公關，有時去品酒分享會教班、做主持、寫專欄講酒，可以嘗試唔同方法推廣葡萄酒文化，反而冇諗過轉入餐飲業做品酒師。當興趣轉做職業，好大壓力。而家自由身幾好，有時間陪老婆，一齊去旅行參觀酒莊，都想出本旅遊書，亦打算考導師資格。」即是想睇番黃大鈞做主播，機會微，參加坊間紅酒 seminar，反而有可能做佢學生！

(繼續閱讀...)